Shirka dib u heshiisiinta Koonfur Galbeed oo la shaaciyay waqtiga la qabanayo.

Waxaa lasoo gaba gabeeyay wada hadaladii ka socday shirka dib u heshiisiinta Koonfur Galbeed ee ka socday magaalooyinka Xudur iyo Baydhabo oo uu ku baaqay Sheekh Aadan Maxamed Nuur (Madoobe) oo ah guddoomiyaha golaha shacabka. Furitaanka shirka dib u heshiisiinta ayaa ka dhici doona Baydhabo 5-ta Janaayo 2023, sida ay ku heshiiyeen Madaxweynaha Koonfur Galbeed iyo Guddoomiyaha Baarlamaanka Soomaaliya.

Si loo xaqiijiyo kalsoonida dowladnimo iyo in Al-Shabaab laga xoreeyo guud ahaan dalka, guddoomiyaha baarlamaanka iyo madaxweynaha Koonfur Galbeed ayaa ku baaqay in la xoojiyo wada shaqeynta iyo wada shaqeynta hay’adaha dowladda ee labada heer. Koox heer farsamo ah oo ka shaqayn doonta kor u qaadida arrimaha dib u heshiisiinta ayaa la filayaa in sida ugu dhaqsiyaha badan u magacaabo Guddoomiyaha Golaha Shacabka.

Koox aqoonyahanno ah iyo xubno ka socda dowladda Federaalka oo ka soo jeeda deegaanada Koonfur Galbeed ayaa 12-dii bishan u safray magaalada Xudur ee xarunta gobolka Bakool si uu uga furmo shirka wadatashiga dib u heshiisiinta Koonfur Galbeed. Wafdiga ayaa waxaa hogaaminayay Guddoomiyaha Golaha Shacabka.

Qodobada lagu heshiiyey ee ay wada gaareen Guddoomiyaha Golaha Shacabka, Hoggaamiyaha Dowlad Goboleedka Koonfur Galbeed, iyo dhammaan qeybaha kala duwan ee bulshada waxaa ka mid ah;

 

1- In  dhamaan  qaybaha kala duwan ee bulshada sida odayaasha, culimaa’udiinka, ganacsatada, dhalinyarada iyo haweenka si dhab ah ugu istaagaan dedaalada la-dagaalanka aragagixisada oo ay hormuudka ka yihiin Ciidanka Xoogga Dalka Soomaaliyeed iyo dhammaan qaybaha kale ee ciidamada qalabka sida.

2- In la xoojiyo  xiriirka iyo wada shaqaynta hay’adaha dowladda ee labada heer (fedaraal iyo dowlad goboleed) si loo xaqiijiyo kalsooni buuxda iyo natiijooyin wax ku ool u ah dawladnimada si looga xoreeyo dalka kooxaha Khawaarijta.

3- In laga wada-shaqeeyo xaqiijinta xasilooni siyaasadeed oo ku qotanta kalsooni, midnimo, sarreynta dastuurka iyo xeerarka dalka.

4- In sida ugu dhakhsiyaha badan Gudoomiyaha Golaha Shacabka uu u soo magacaabo guddi heer farsamo oo ka shaqeeya dar dar galinta shirka arrimaha dib-u-heshiisiinta heer farsamo.

5- Furitaanka shirka waxaa loo asteeyey 5-ta Janaayo 2023-ka kaas oo ka dhici doona Baydhabo.

6- Gudoomiyaha Golaha Shacabka ahna Ku-simaha Hogaamiyaha Jamhuuriyadda Federaalka Soomaliya ayaa ka mahad celinayaa soo dhoweyntii diiraneyd ay u sameeyeen madaxda iyo shacabka Koonfur Galbeed.