Wasiirada Maaliyada ee maamul goboleedyada ayaa shaaca ka qaaday sababta ay u joojiyeen la shaqeynta dowladda.

Xalay ayay ahayd markii waaxyaha maaliyadda dowlad goboleedyada ay go’aan ku gaareen in ay joojiyaan wada shaqeyntii ay la lahaayeen wasaaradda maaliyadda ee dowladda Soomaaliya. Axmed Maxamed Xuseen Wasiirka Maaliyadda Koonfur Galbeed Soomaaliya ayaa xogta rasmiga ah ee arrintan ka warbixiyay.

Sida uu sheegay Wasiir Axmed, Wasaaradda Maaliyadda Xukuumadda Federaalka Soomaaliya ayaa joojisay wada shaqeyntii ay la lahayd Wasaaradaha Maaliyadda ee Dowlad Goboleedyada, taasi oo ka dhalatay tallaabada uu qaaday Wasiirka cusub.

"Waxaan walaac ka qabnaa hannaanka wada shaqeyn ee dowladda Federaalka khaas ahaan Wasaaradda Maaliyadda oo dhinac martay hannaan lagu shaqeynayay oo lagu heshiiyay, Wasaaradaha Maaliyadda kama shaqeeyaan siyaasadda balse waxa ay xoogga saaraan hagaajinta maaliyadda iyo deyn cafinta. Wasiirka cusub ee Maaliyadda Xukuumadda Federaalka waxaan ka dareenay oo aan ku aragnay in uu si toos ah u baalmaray waxyaabihii aan ku heshiinay, isaga oo aan shaqada la qabsan ayuu gacan bidixeys ku sameeyay maamul goboleedyada, waxaana jira heshiisyo qoran oo gudaha iyo dibadda aan kula galnay dowladda Federaalka” ayuu yiri wasiirka Maaliyadda Koonfur Galbeed Axmed Maxamed Xuseen.

Wasiirka Maaliyadda Maamulka Koonfur Galbeed ayaa sidoo kale sheegay in Wasiirka Maaliyadda Xukuumadda Federaalka Soomaaliya uu keligiis u baxay shaqadii loo baahnaa in uu kala tashado dowlad goboleedyada dalka, isagoo aan tixgalin u sameyn Wasaaradaha Maaliyadda ee dowlad goboleedyada dalka, isla markaana aan la tixgalin. taasina waxay keentay in ay joojiyaan Wasaaradaha Maaliyadda ee dawlad goboleedyada dalka. wada shaqayn dhexmarta dawladda dhexe ee dalka iyo wasaaradeeda maaliyadda.