U adkeysiga inta lagu jiro dhibaatada khawaarijta: Soomaaliya oo kujirta dagaalka lagu gaarayo nabadda iyo amni

Kadib weerarkii khasaaraha badan dhaliyay ee al-Shabaab ay ka geysteen magaalada Beledweyne oo galaaftay nolosha in ka badan 30 qof, Soomaaliya waxa ay gashay qalalaase hor leh. Maalmo ka dib, weerar kale oo ismiidaamin ah oo loo adeegsaday gaari walxaha qarxa laga soo buuxiyay ayaa ka dhacay gobolka Hiiraan, kaasoo markan ka dhacay degmada Buulaburde, kaasoo sababay dhimashada ugu yaraan lix qof iyo dhaawaca afar ka badan. Weerarkan ayaa waxaa fuliyay ruux naftiis hure ah oo watay gaari, taasoo argagax ku beertay bulshada dhexdeeda.

Goob joogayaal ayaa ku waramay in qaraxa uu dhacay xili ciidamada amaanka ay ku raad joogeen gaariga oo laga soo buuxiyay walxaha qarxa. Gaariga ayaa la sheegay in uu ka soo galay degmada dhanka galbeed ee xaafadda, waxaana la sheegay in ay ilaalada ka qabteen.

Musiibada ka dhacday degmada Buulaburde ayaa timid kadib markii gaari lagu soo xiray walxaha qarxa uu ku soo dhawaaday koontaroolka magaalada Beledweyne, halkaasoo ay ku naf waayeen in ka badan 30 ruux, halka 50 kalena ay ku dhaawacmeen. Dhacdooyinka taxanaha ah ee murugada leh ayaa sawir xun ka bixinaya halista joogtada ah ee argagixisanimada ee gobolka.

Waxaa xusid mudan in weerarka ka dhacay Buulaburde uu dhacay saacado un kadib markii ciidamada milateriga Soomaaliya ay fashiliyeen labo isku day oo la doonayay in lagu qarxiyo gaadiid laga soo buuxiyay waxyaabaha qarxa oo ka dhacay duleedka magaalada Dhuusomareeb ee xarunta gobolka Sh/dhexe. Dhuusa-mareeb ayaa hadda ah xarunta maamulka Galmudug, waxaana ku sugan madaxweynaha Soomaaliya Xasan Sheekh Maxamuud oo ka soo guuray caasimadda dalka ee Muqdisho. Joogitaankiisa Dhuusamareeb waxay ka dhigan tahay sida ay uga go’an tahay isku dhafka ciidamada deegaanka iyo kor u qaadista niyadda ciidamada safka hore.

Ururka argagixisada ah ee al-Shabaab ayaa sheegatay mas'uuliyadda falalkan foosha xun, iyagoo hoosta ka xariiqay khatarta joogtada ah ee ay ku hayaan ammaanka iyo xasilloonida Soomaaliya.

Tan iyo markii Madaxweyne Xasan Sheekh Maxamuud loo doortay mar labaad sannadkii hore, waxa uu xoojiyey dadaallada lagula dagaalamayo Al-Shabaab, isagoo bilaabay wax uu ugu yeeray dagaal dhan walba ah. Si aan caadi ahayn, weerarkan oo xoogeystay ayaa sababay in ay sare u kacaan weerarada Al-Shabaab, taasoo laba jibaartay dhacdooyinka gobolka. Iyadoo ay jiraan caqabadahaas, ayaa ururka argagixisada waxa uu lumiyay dhul baaxad leh oo ka tirsan gobollada dhexe ee Soomaaliya, oo ay ku jirto magaalo xeebeedka Xarardheere oo muddo toban sano ah gacanta ugu jirtay mintidiinta.

Weeraradii ugu dambeeyay waxay xusuusinayaan halganka nabadda iyo ammaanka ee Soomaaliya ka socda. Go'aanka madaxweyne Maxamuud ee ah in si toos ah looga hortago al-Shabaab ayaa hoosta ka xariiqaysa culeyska ay leedahay xaaladdu iyo sida degdegga ah ee taageerada caalamiga ah ee looga caawinayo Soomaaliya la dagaalanka khatartan joogtada ah.