Wajiga 2-aad ee barnaamijka Baxnaano, dowladdu waxay ku bixin doontaa kaalmo dhaqaale 160,000 qoys.

Wajigii labaad ee mashruuca qoysaska uu saameeyay  ayaxu ayaa Sabtidii, November 6, 2021 ka bilowday magaalada Baydhabo ee xarunta maamulka Koonfur Galbeed. Wajigii kowaad waxa la siinayay $60 bishiiba muddo lix bilood ah 102,000 qoysas oo ku nool 42 degmo oo ka tirsan Soomaaliya.

Wajiga 2-aad ayaa dowladda waxa ay taageero dhaqaale ka heshay Bankiga Adduunka, taasoo u ogolaaneysa in la gaarsiiyo 160,000 qoys oo cusub oo ku kala nool 48 degmo oo ka tirsan Soomaaliya. Furitaanka mashruucan ayaa waxaa goob joog ka ahaa Wasiirada Shaqada iyo Arrimaha Bulshada ee Puntland, Jubbaland, Hirshabeelle, Galmudug iyo Koonfur Galbeed, waxayna bogaadiyeen taageerada ay dowladdu la garab taagan tahay Dadka nugul iyo kuwa uu saameeyey Ayaxa.

Mudane, Cabdiwahaab Ugaas Xuseen Ugaas Khaliif , Wasiirka Shaqada iyo Arrimaha Bulshada Xukuumadda Federaalka Soomaaliya ayaa sheegay  inay Dawladda ku guulaysatay in si degdeg ah uga jawaabto saamaynta Ayuxu u gaystay bulshada nugul.

“Mashruucan caawinta dadka Ayuxu saameeyay wuxuu ka caawinayaa bulshada aadka saboolka u ah inay ku negaadaan deegaannadooda, dibna u wataan noloshooda beeraha, xoolaha iwm. Waxaan haddaba ka rajaynayaa mas’uuliyiinta Dawlad-goboleedyadu inay doorkooda shariifka ah ka qaataan Meelmarinta hawlahan bulshada nugul loogu adeegayo.” ayuu yiri Wasiir Cabdiwahaab Ugaas Xuseen.

Guddoomiyaha Baarlamaanka Koonfur Galbeed, ahna ku-simaha Madaxweynaha, Cali Saciid Fiqi ayaa ku tilmaamay daahfurka wajiga labaad ee mashruucan inuu door weyn ka qaadanayo ka hortagga saameyn ay Bulshada kala kulmaan dhibaatooyinka uu u geystay Ayaxa.

FGS launched in #Baidoa, the 2 phase of the project of supporting Locust affected families. 160,000 families in 48 districts across #Somalia will benefit from the project. “FGS committed in responding the crisis that affects the people” said @AbdiwahabUgasH, M. of Social Affairs. pic.twitter.com/23vQVcMu57

— SNTV News (@sntvnews1) November 6, 2021

“Mashruucan oo ujeeddadiisu tahay Bulshada inaysan deegaannadooda ka barakicin, wuxuu sidoo kale Bulshada kalsooni ku siinayaa sida ay Dawladda diyaar ugu tahay ka jawaabida marxadaha deg degga ah ee saameynta bulsho geysta.” ayuu yiri Guddoomiye Cali Fiqi oo si rasmi ah markaa u daahfuray mashruuca.

Mashruuca si degdeg ah uga jawaabidda masiibooyinka saameeya bulshada, ayaa qeyb ka ah siyaasadda Ilaalinta Bulshada ee Wasaaradda Shaqada iyo Arrimaha Bulshada Federaalka, gaar ahaan barnaamijka Baxnaano.